KUTEMBEA KATIKA ROHO-3

Bwana Yesu asifiwe sana mwana wa Mungu..!!

Karibu sana tuendelee na sehemu ya tatu ya Mwendelezo wa somo letu la KUTEMBEA KATIKA ROHO,kama hukupata nafasi ya kupitia sehemu ya kwanza,na ya pili unaweza kulipata kwenye blog yetu ya rhemavoice.blogspot.com au kwenye page yetu ya facebook-Rhema’s Voice Ministry.

Sehemu ya pili tuliomwangalia Mtumishi wa Mungu Musa, leo tunaendelea kwa kumwangalia Mtumish wa Mungu Ahithofeli

2.Ahithofeli.

Huyu ndugu sio mtu maarufu sana kwenye Biblia lakini alikuwa mtu muhimu sana katika mafanikio ya Mfalme Daudi.Huwezi kuzungumzia Mafanikio ya Ufalme wa Daudi bila kumtaja huyu ndugu.Katika moja ya watu ambao Mungu alimpa Daudi ni huyu ndugu Ahithofeli.Alikuwa na Karama ya Ajabu,Shauri lilitoka kinywani mwake lilikuwa kana kwamba limetoka moja kwa moja kwenye kinywa cha Mungu mwenyewe.Alikuwepo Kuanzia utawala wa Daudi mpaka utawala wa Absolum mtoto wa Daudi.

Tutazame maandiko

2Samweli 16:20-23

20 Kisha Absalomu akamwambia Ahithofeli, Haya, toa shauri lako, tufanyeje.

21 Naye Ahithofeli akamwambia Absalomu, Ingia wewe kwa masuria ya baba yako, hao aliowaacha ili kutunza nyumba; na Israeli wote watasikia ya kuwa umechukizwa kabisa na baba yako; ndipo itatiwa nguvu mikono yao wote walio pamoja nawe.

22 Basi wakamtandikia Absalomu hema juu ya nyumba darini; naye Absalomu akaingia kwa masuria ya babaye machoni pa Israeli wote.

23 Na shauri lake Ahithofeli, alilokuwa akilitoa siku zile, lilikuwa kama mtu aulizapo kwa neno la Mungu; ndivyo yalivyokuwa mashauri yote ya Ahithofeli, kwa Daudi, na kwa Absalomu.

Mstari wa 23 unasema katika kipindi cha Daudi na Absalomu Shauri lililotoka kinywani mwa huyu mtumshi lilikuwa kama Neno litokalo kinywani mwa Bwana.

Ukiona hata hapo juu Absalomu alipoomba shauri kipindi amempindua Baba yake Daudi huyu jamaa alitoa Shauri sawasawa na Adhabu aliyoisema Bwana kwa Kinywa cha Nabii Nathani kipindi Daudi alipodhini na mke wa Huria.Msikie Nabii Nathani hapo mwanzo

2Samweli 12;11-12

11 Bwana asema hivi, Angalia, nitakuondokeshea uovu katika nyumba yako, nami nitawatwaa wake zako mbele ya macho yako, na kumpa jirani yako, naye atalala na wake zako mbele ya jua hili.

12 Maana wewe ulifanya jambo lile kwa siri; bali mimi nitalifanya jambo hili mbele ya Israeli wote na mbele ya jua.

Tazama Mungu alisema Neno hili kipindi Daudi amekosa na hapa Absalomu anaingia tu madarakani anauliza Shauri kwa Ahithofeli na Shauri analopewa ni Neno lilelile lilotamkwa na Nabii Nathani.

Pamoja na Kuwa Huduma kubwa hivi huyu ndugu mwisho wake haukuwa mzuri hata kidogo na hii ni kwasababu hakuweza kutembea katika Tunda la Roho Mtakatifu.

2Samweli 17;14

14 Naye Absalomu na watu wote wa Israeli wakasema, Shauri la Hushai, Mwarki, ni jema kuliko shauri la Ahithofeli. Kwa maana Bwana alikuwa amekusudia kulivunja shauri jema la Ahithofeli, ili Bwana alete mabaya juu ya Absalomu.

2Samweli 17;23

23 Naye Ahithofeli alipoona ya kuwa shauri lake halikufuatwa, akatandika punda wake, akaondoka, akaenda nyumbani kwake, mjini mwake, akaitengeneza nyumba yake, akajisonga; akafa, akazikwa kaburini mwa babaye.

Mstari wa 14-Absolumo aliomba shauri la pili na Ahithofeli akatoa shauri ambalo kama lingefuatwa Daudi angeangamizwa lakini Mungu alijibu ombi la Daudi hapo Daudi aliomba akiwa anamkimbia Mwanawe Absalomu ‘’ Mtu mmoja akamwambia Daudi ya kwamba, Ahithofeli yu katika hao waliopatana na Absalomu; Daudi akasema, Ee Bwana, nakusihi, uligeuze shauri la Ahithofeli liwe ubatili.”(2Samweli 15;31). Daudi alijua karama ya Ahithofeli ndio maana alifanya ili ombi.

Shauri la Ahithofeli likakataliwa sawasawa na Ombi la Daudi kwa Bwana,lilikuwa ni shauri jema kwa upande wa Absolumo.

Nataka uone alichokifanya Ahithofeli baada ya shauri lake jema kuachwa.Neno linasema alienda nyumbani kwake akajitundika akafa.Karama kubwa lakini Tunda la Uvumilivu,Tunda la Upendo halikuwa kwake,hakujua jinsi ya kustahimili kukataliwa,hakuwa na Tabia ndani yake ambayo ingemvusha katika kipindi shauri lake limedharauliwa.Na sio kwamba shauri lake lilikuwa Baya hapana bado lilikuwa ni jema,lakini lilipuuzwa kwasababu nyuma kulikuwa na mkono wa Mungu.

Lakini huyu ndugu alisusa kwa namna ya ajabu, alienda mbali aliona amedharauliwa sana akaamuwa kujinyonga.Alipokosa uvumilivu mauti ikapata mlango wa kumwangamiza.Alisusa akaijitenga na watumishi wenzake.

Je si hali kama hii tuliyonayo ndani ya kanisa,ndani ya Wana wa Mungu.Watumishi kususa huduma,kujitenga kabisa na Kanisa.Kondoo kurudi majumbani na kugoma kwenda katika kusanyiko kwa sababu tu shauri lake lililojema halikusikilizwa.Kususa kazi ya Mungu kwingi kunakolifanya kanisa lisitembee katika kiwango kile kilichokusuidiwa kwasababu kina Ahithofeli wa Leo wamesusia Huduma kwasababu ya kudharauliwa na Karama zao wameenda nazo nyumbani na taratibu mauti inawanyemelea katika utumishi wao.

Mwana wa Mungu Tunda la Roho Mtakatifu ndio unachohitaji,Kususa ni tabia ya mwili.Angalia Wanandoa ambao ni Wana wa Mungu kususiana ni kitu ya kawaida kwasababu shauri lake limekataliwa.

Karama haitakuvusha saa ya kukataliwa,Karama haitakuvusha saa ya kudharauliwa bali Tabia ya Roho Mtakatifu ndio itakuvusha.Sikwambii kuwa mwili hautaamka kukutaka ususe la hasha,lakini ufishe kwa kuitikia Tunda la Roho Mtakatifu.

Unaacha kuimba unasema wapo mwilini siwezi kuhudumu nao,unasusa unafikiri ndio upo Rohoni,ndugu yangu sasa ndio unatembea mwilini haswa.

Haijalishi unaUimbaji wa kiwango cha juu kiasi gani kama Huna Upendo na uvumilivu utaishia kususa tu huduma.

Wekeza kukua katika matunda ya Roho Mtakatifu.

Naamini kuna kitu Yesu ameachilia ndani yako na umepata hatua katika kujifunza kutembea katika Roho,kutembea katika Matunda ya Roho Mtakatifu.

Mungu akitupaa Neema yake tutaendelea wiki ijayo na somo hili.

Barikiwa sana mpendwa wa Bwana.