KUTEMBEA KATIKA ROHO

KUTEMBEA KATIKA ROHO.

Wagalatia 5:22-25

 22 Lakini tunda la Roho ni upendo, furaha, amani, uvumilivu, utu wema, fadhili, uaminifu,

 23 upole, kiasi; juu ya mambo kama hayo hakuna sheria.

 24 Na hao walio wa Kristo Yesu wameusulibisha mwili pamoja na mawazo yake mabaya na tamaa zake.

 25 Tukiishi kwa Roho, na tuenende kwa Roho.

BWANA YESU ASIFIWE mwana wa Mungu.

Karibu tujifunze kwa pamoja Neno la Mungu.Kama kichwa cha somo kinavyosema hapo juu,tutajifunza kwa Msaada wa Roho Mtakatifu jinsi ya kutembea au kuenenda/kutembea katika Roho.Tutaangalia mambo kadhaa wa kadhaa kwa kadiri Roho Mtakatifu atakavyotuongoza.

Ni kawaida sana kusikia mtu akisema hauko Rohoni au upo mwilini.Mpaka tutakapokuwa tumemaliza mfululizo wa somo hili utakuwa umepata ufahamu mkubwa utakao kupa hatua kubwa sana katika maisha yako ya kiroho.

Yohana 3

 6 Kilichozaliwa kwa mwili ni mwili; na kilichozaliwa kwa Roho ni roho.

 7 Usistaajabu kwa kuwa nilikuambia, Hamna budi kuzaliwa mara ya pili.

Mtu anapookoka yaani anapompokea Yesu Kristo,ndipo huwa anazaliwa mara ya pili.Kinachozaliwa upya ni roho ya yule aliyeokoka.Baada ya kuokoa mtu anakuwa mpya kabisa katika roho yake,lakini katika nafsi ile ile na mwili ule ule wa Zamani.

2Wakorinto 5;

17 Hata imekuwa, mtu akiwa ndani ya Kristo amekuwa kiumbe kipya; ya kale yamepita tazama! Yamekuwa mapya.

Upya huu unatokea katika roho ya mtu,Roho Mtaktifu anamzaa mtu kwa upya.

Maana yake kuanzia hapo anakuwa ni mtu mwenye roho mpya yaani kiumbe kipya ila katika mwili wa zamani.Neno linasema miili yetu itabadilishwa katika Ufufuo hapo ndipo tutapata miili mipya.Roho Mtakatifu ameuhisha roho zetu ila miili yetu bado haijauhishwa.

Warumi 8

11 Lakini, ikiwa Roho yake yeye aliyemfufua Yesu katika wafu anakaa ndani yenu, yeye aliyemfufua Kristo Yesu katika wafu ataihuisha na miili yenu iliyo katika hali ya kufa, kwa Roho wake anayekaa ndani yenu.

23 Wala si hivyo tu; ila na sisi wenyewe tulio na malimbuko ya Roho, sisi pia tunaugua katika nafsi zetu, tukikutazamia kufanywa wana, yaani, ukombozi wa mwili wetu.

Kwa maana hiyo baasi mtu aliyeokoka ni mtu mpya katika mwili wa zamani,mwili wenye asili ya dhambi.Hii ndio inayoleta jukumu sasa la mtu kuutisha mwili wake na matendo yake.Mtu aliyeokoka anapaswa kuishi kwa kufuata roho yake akiongozwa na Roho Mtakatifu.

Roho Mtakatifu anapomzaa mtu upya huizaa roho yenye matunda yaliyotajwa hapo juu.Hivyo kama ataishi kwa kufuata roho yake iliyozaliwa upya atatembea katika Matunda ya Roho Mtakatifu yaliyomiminwa ndani ya roho yake alivyozaliwa mara ya pili.Matunda hayo ni haya UPENDO,FURAHA,AMANI,UVUMILIVU,UTU WEMA,FADHILI,UAMINIFU,UPOLE na KIASI.

Haya ndio matunda ya Roho Mtakatifu ambayo mwana wa Mungu anatakiwa kutembea katika hayo.Kuenenda katika Roho ni kutembea katika matunda ya Roho mtakatifu,ni kutembea katika tabia za Roho Mtakatifu.Kutembea katika Roho sio kutembea ukinena kwa lugha au ukiomba kila mahali japo unaweza kuwa unafanya hivyo kwakuongozwa na Roho Mtakatifu.Kutembea katika Roho ni kuishi kwa Upendo,ni kuishi kwa uvumilivu, ni kuishi kwa uaminifu.Mtu yoyote anayetembea katika haya huyo ndiye mtu anayetembea katika Roho.

Kutokana na kwamba mtu aliyeokoka anaishi katika mwili ambao nao unamatunda yake,kunakuwa na upinzani kwasababu mwili utataka kuutimiza matakwa yake,wakati huo huo roho ikitaka kutimiza ya kwake.

Hivyo mtu anajukumu la kuutiisha mwili,yaani kuufisha kabisa mwili ili usidhihirishe matunda yake.Jukumu la kuufisha mwili ni la kwako wala si la Mungu.

Kuna vitu viwili ambavyo ni matokeo ya Roho Mtakatifu kwenye maisha ya mtu.

1.Tunda la Roho Mtakatifu (Wagalatia 5;22-23)

Hili mtu anapozaliwa mara ya pili linakuwa ndani ya roho yake iliyozaliwa upya.

Kuanzia hapo anajukumu la kukua katika matunda hayo kwa kufuata msukomo wa tabia hizi za Roho Mtakatifu.Hizi kila aliyeokoka anazo na anapaswa kudhihirisha hizo tabia kwenye maisha yake.Kama umeokoka unapaswa kudhihirisha tabia hizi kwasababu ni tabia zilizoachiliwa ndani ya roho yako mpya siku ulipozaliwa.

2.Karama za Roho Mtakatifu

Karama za Roho Mtakatifu hizi huachiliwa na Roho Mtakatifu kwa mtu aliyeokoka kwa ajili ya kufanya kazi kwenye ofisi ya Ufalme wa Mungu.Hizi ni zaidi ya Tabia,hivi ni vitendea kazi kutokana na ofisi aliyopewa mtu katika zile ofisini tano alizotoa Yesu.

1Wakorinto 12;4-11.

4 Basi pana tofauti za karama; bali Roho ni yeye yule.

 5 Tena pana tofauti za huduma, na Bwana ni yeye yule.

 6 Kisha pana tofauti za kutenda kazi, bali Mungu ni yeye yule azitendaye kazi zote katika wote.

 7 Lakini kila mmoja hupewa ufunuo wa Roho kwa kufaidiana.

 8 Maana mtu mmoja kwa Roho apewa neno la hekima; na mwingine neno la maarifa, apendavyo Roho yeye yule;

 9 mwingine imani katika Roho yeye yule; na mwingine karama za kuponya katika Roho yule mmoja;

 10 na mwingine matendo ya miujiza; na mwingine unabii; na mwingine kupambanua roho; mwingine aina za lugha; na mwingine tafsiri za lugha;

 11 lakini kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye.

Karama hizi huachiliwa kutegemea kile ambacho Roho Mtakatifu amekusudia kukifanya kupitia Yule mtu kwa wakati ule au kufuatana na Ofisi ya mtu katika mwili wa Kristo.

Waefeso 4:11-13

11 Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu;

 12 kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe;

 13 hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo;

Utaona Neno ili Huduma itendeke,Yesu ndiye anayelijenga kanisa lake,ndiye anayekamilisha watakatifu kupitia Ofisi hizi 5 alizotoa hapo.Kila ofisi inahitaji vitendea kazi yaani karama ili huduma husika ifanyike.Karama hizi ndio hutolewa na Roho Mtakatifu kulingana na ofisi na huduma inayokusudiwa kwa wakati ule.

Huwezi kuta Mwalimu anapewa karama ya Unabii kwasababu ofisi yake hahiitaji Unabii kafanya huduma yake,lakini Nabii hawezi kufanya huduma yake pasipo Karama ya Unabii.Japo inaweza kutokea kutokana na huduma aliyokusudia Roho Mtaktifu kuifanya ndani ya kanisa akaachilia Neema juu ya Mwalimu akahudumu kwa Roho ya Unabii kwa wakati huo na baada ya kumaliza alichokusudia anabaki kuwa Mwalimu na vitendea kazi vingine anavyovihitaji ili kuhudumia.

Mpaka hapo utaona tumejikuta tuna karama za Roho Mtakatifu na Tabia au Tunda la Mtakatifu.

Kwa leo tuishie hapo mwana wa Mungu,Tutaendelea week ijayo na sehemu ya pili.

Naamini Umepata Ufahamu mpya ndani yako,usikose kufuatilia sehemu inayofuata ambako tutaingia ndani zaidi.