MAMBO YANAYOWEZA KUKUFANYA KUSHINDWA KUFIKIA MWISHO WAKO MUNGU ALIOKUPANGIA-1

LENGO KUU LA SOMO

Lengo kuu la somo hili ni kujitathimini uhusiano wako na Mungu katika maendeleo yako ya kiroho, kibinafsi na kimwili katika kufikia mwisho ambao Mungu amepanga ufikie katika kipindi chote cha maisha yako hapa duniani.

Neno la Somo

Kumb 34:1-5

“¹Musa akapanda kutoka uwanda wa Moabu mpaka mlima Nebo, hata kilele cha Pisga kukabili Yeriko. BWANA akamwonyesha nchi yote Gileadi hata Dani; ² na Naftali yote, na nchi ya Efraimu na Manase, na nchi yote ya Yuda, mpaka bahari ya magharibi; ³ na Negebu, na uwanja wa bonde la Yeriko, mji wa mitende, hata mpaka Soari. ⁴ BWANA akamwambia, Hii ndiyo nchi niliyowaapia Ibrahimu, na Isaka, na Yakobo, nikisema, Nitawapa wazao wako. Basi nimekuonyesha kwa macho yako, lakini hutavuka huko. ⁵ Basi Musa, mtumishi wa BWANA, akafa huko, katika nchi ya Moabu, kwa neno la BWANA.”

Kuna vitu ambavyo vinakufanya usiweze kufikia mahali Mungu alipotaka ufike ama usiweze kupata vitu ambavyo Mungu alitaka upate. Japo kwa macho ya damu na nyama tunaona kuwa ni vitu vidogo na vya kawaida sana lakini vinaathari kubwa sana katika ulimwengu wa roho katika mahusiano ya mtu na Mungu.

Sehemu ya Kwanza

HASIRA NA KUTOKUAMINI (UTII)

Maandiko yanasema katika Kumb 34 kuwa Musa alikufa huko katika nchi ya Moabu katika kilele cha Pisga katika mlima Nebo kwa NENO LA BWANA.

Ukisoma vizuri kitabu cha KUMBUKUMBU utagundua kuwa Mungu hakutaka Musa aishie Moabu bali alikusudia afike nchi ya ahadi yaani Kaanani. Maandiko yanasema kuwa Musa alikufa akiwa na miaka 120, jicho lake halikupofuka wala nguvu za mwili wake hazikupunguka.

Mungu alimpa Musa kazi kubwa mbili;

(1) Kuwatoa wana wa Israeli kutoka mikononi mwa Farao katika nchi ya Misri ambapo walikaa kama watumwa kwa zaidi ya miaka 400. Kutoka 3:10 inasema “Haya, basi, nitakutuma sasa kwa Farao, ili upate kuwatoa watu wangu, hao wana wa Israeli, katika Misri.”

(2) Kuhakikisha kuwa wana wa Israeli wanafika Kaanani.

Kutoka 3:9,17“Basi, tazama, kilio cha wana wa Israeli kimenifikia; tena nimeyaona hayo mateso ambayo Wamisri wanawatesa. Nami nimesema, Nitawapandisha kutoka katika mateso ya Misri na kuwaingiza katika nchi ya Mkaanani, na Mhiti, na Mwamori, na Mperizi, na Mhivi, na Myebusi, nchi ijaayo maziwa na asali.”

Lengo la Mungu lilikuwa Musa na Haruni waingie Kaanani pamoja na wana wa Israeli wote, lakini hawakuweza kuingia kwa sababu ya kuasi (kwenda kinyume cha neno la Mungu) walipo upiga mwamba ili utoe maji badala ya kuuambia kama BWANA alivyokuwa amewaagiza.

Hesabu 20: 7-13“⁷ BWANA akasema na Musa, akinena, ⁸...ukauambie mwamba mbele ya macho yao utoe maji yake…..¹¹ Musa akainua mkono wake akaupiga ule mwamba kwa fimbo yake mara mbili; maji yakatoka mengi, mkutano wakanywa na wanyama wao pia. ¹² BWANA akamwambia Musa na Haruni, Kwa kuwa hamkuniamini mimi, ili kunistahi mbele ya macho ya wana wa Israeli, basi kwa sababu hiyo, hamtawaingiza kusanyiko katika ile nchi niliyowapa. ¹³ Maji haya ni maji ya Meriba; kwa sababu wana wa Israeli waliteta na BWANA, naye alijionyesha kuwa mtakatifu kati yao.”

Shida iliyokuwa ikimsumbua Musa ni hasira. Tangia Musa anaitwa na Mungu alikuwa akifanikiwa kutengeneza mambo yake na ya watu wake kila wanapokosea lakini safari hii hakufanya hivyo ikapelekea kifo chake na cha ndugu yake Haruni na hapo ndipo ilipo kuwa mwisho wa safari yao (Musa na Haruni) kuelekea Kaanani. Kifo cha Haruni (Hesabu 20:22-29), kifo cha Musa (Kumb 32:48-52; 34:1-5).

Lakini katikati ya safari kutoka Misri kwenda Kaanani liliibuka swala la kuandika Torati (Kumb 31:24 “Basi ikawa hapo Musa alipomaliza kuandika maneno ya torati hii katika chuo, hata yakaisha,”).

Musa na Haruni hawakumwamini na hawakumtakasa Mungu katika maji ya Meriba huko Kadeshi kwa kuupiga mwamba badala ya kuuambia utoe maji kama Mungu alivyo waagiza wafanye.

Mbali na kutokuamini kwao, lakini kitu kingine ni kuwa Musa alikuwa hapendi sana kuona wana wa Israeli wanalalamika lalamika juu ya Mungu ama wakienda kinyume na mapenzi ya Mungu. Hivyo, wakati mwingine walipo kuwa wakimlalamika au walipokwenda kinyume, Musa alikasirika sana na yeye analalamika kwa Mungu. Hesabu 11:4-15 “¹⁰Basi Musa akawasikia watu wakilia katika jamaa zao zote, kila mtu mlangoni pa hema yake; na hasira za BWANA zikawaka sana; Musa naye akakasirika. ¹¹Musa akamwambia BWANA, Mbona umenitenda uovu mimi mtumishi wako? Kwa nini sikupata neema machoni pako, hata ukanitwika mzigo wa watu hawa wote juu yangu? ¹²Je! Ni mimi niliyewatungisha mimba watu hawa wote...”

Kutoka 32:19 “Hata alipoyakaribia marago akaiona ile ndama, na ile michezo.Hasira ya Musa ikawaka, akazitupa zile mbao mikononi mwake, akazivunja chini ya mlima.”

Ukisoma Hesabu 20 utakuja kuona kuwa kitu ambacho wana wa Israeli walikifanya katika sura ya 11 ndicho hicho pia wanakifanya sura ya 20. Walikuwa ni watu wa kulalamika kila wanapo pungukiwa na jambo fulani katika safari yao. Na macho yao yote yalikuwa ni kwa Musa. Ilifika wakati Musa alichoshwa na lawama zao na kutokuridhika kwao hali iliyokuwa ikimfanya akasirike sana hata kufikia kumwomba Mungu amuue “Na kama ukinitenda hivi, nakuomba uniulie mbali, kwamba nimepata fadhili mbele ya macho yako; nami nisiyaone haya mashaka yangu” Hesabu 11:15.

Hesabu 20:10 inatuonyesha dhahiri kuwa Musa alikuwa amekasirika sana. Hii tunaiona ambavyo Musa aliwaita wana wa Israeli baada ya kuwakusanya, aliwaita ‘waasi’. Musa alisema “…Sikieni sasa, enyi waasi; je!Tuwatokezee maji katika mwamba huu?” Hilo neno waasi kwenye tafsiri ya kiingereza limetumika neno ‘rebels’ ambalo ni‘a person who resists an established authority, often violently’. Maana yake kwa Kiswahili twaweza sema ni ‘mtu anayepinga au anayezuia mamlaka yaliyoanzishwa kwa njia ya machafuko’

Sasa Musa aliwaita watu wa Israeli rebels (waasi), watu wanaopinga mamlaka yaliyopo. Hii inatuonyesha kuwa Musa alikuwa na ghadhabu juu yao kutokana na neno alilolitumia. 1 Samweli 15:23 “Kwani kuasi ni kama dhambi ya uchawi…”.1 Yohana 3:4 inatupa maana ya neno UASI, “Kila atendaye dhambi, afanya uasi; kwa kuwa dhambi ni uasi.”

Tatizo la Musa kutokufika nchi ya ahadi halikuwa ni hasira, bali ni matokeo ya hasira yake. Maandiko yanatuweka wazi kuhusiana na hasira ya mpumbavu na hasira ya mchukia uovu (hasira takatifu). Maandiko yanaposema hasira hukaa kifuani mwa mpumbavu, haimaanishi kila mwenye hasira ni mpumbavu bali inategemea ni aina gani ya hasira na inaleta matokeao gani.

Ayubu 5:2a; 36:18a inaposema “Kwani hasira humwua mtu mpumbavu” “Basi ujitunze, isije hasira ikakuvuta hata ukafanya mzaha;” haimaanishi kila mwenye hasira atakufa ila inategemea ni aina gani ya hasira mtu aliyokuwa nayo. Hasira inayomwua mtu mpumbavu ni hasira ya kutaka uovu au hasira ya kuleta matokeao ya uovu. Pia hasira yaweza kuwa takatifu (hasira ya kuchukia uovu) lakini mwisho wake ikakupeleka kutenda jambo lisilo takatifu mbele za Mungu ndio maana maandiko yanasema basi ujitunze, isije hasira ikakuvuta hata ukafanya mzaha.

Mungu na Musa wote walipata hasira juu ya watu wa Israeli kwa kulalamika lalamika. Mungu hapendi uovu. Ndio maana hukasirika pale mtu anapotenda uovu ila humpenda mtu anaechukia uovu. Mungu alipenda jinsi ambavyo Musa anachukizwa na matendo maovu ya watu wa Israeli kwa maana “Mshindo wake hutoa habari zake, Anayewaka hasira juu ya uovu” Ayubu 36:33.Ufunuo 2:2-6“²Nayajua matendo yako, na taabu yako, na subira yako, na ya kuwa huwezi kuchukuliana na watu wabaya, tena umewajaribu wale wajiitao mitume…³tena ulikuwa na subira na kuvumilia kwa ajili ya jina langu, wala hukuchoka.⁴Lakini nina neno juu yako, ya kwamba umeuacha upendo wako wa kwanza.⁵Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, nami nitakiondoa kinara chako katika mahali pake, usipotubu.⁶Lakini unalo neno hili, kwamba wayachukia matendo ya Wanikolai, ambayo na mimi nayachukia.” Hebu soma kwa kuunganisha maneno yote niliyoyapigia mstari hapo juu (Ufunuo 2:2-6) utapata kuona nini BWANA anachotaka uone kilichotokea kwa Musa.

Tatizo lililomkuta Musa ni matokeo ya hasira yake. Ayubu 36:18 “Basi ujitunze, isije hasira ikakuvuta hata ukafanya mzaha;” Musa hasira yake ilimvuta kumpeleka upotevuni japo alikuwa na hasira takatifu (yakuchukia uovu). Musa na Haruni walifanya kosa kubwa moja ambalo ni ‘kutokumwamini Mungu ili kumstahi mbele ya macho ya wana wa Isaraeli’ (Hesabu 20:12). Kosa hilo moja limegawanyika katika sehemu mbili;

i. Walijitwalia utukufu

ii. Hawakutii agizo la Mungu

Kujitwalia Utukufu

Hesabu 20:10 “Musa na Haruni wakawakusanya kusanyiko mbele ya mwamba, akawaambia, Sikieni sasa, enyi waasi; je! Tuwatokezee maji katika mwamba huu?”Hebu litazame kwa makini neno ‘tuwatokezee’ nililolipigia mstari. Musa na Haruni waliichukua nafasi ya Mungu wakajiweka wao kana kwamba wao ndio wanaofanya maji yatoke katika mwamba. Hawakumrudishia Mungu utukufu kwa jambo hilo. Walisema ‘tuwatokezee…’ (sisi), badala ya kusema ‘je! BWANA awatokezee…’Ni kweli kuwa katika mstari wa 8 Mungu alimwambia Musa ‘…nawe utawatokezea maji katika mwamba…’ lakini haikuwa sababu ya kumfanya Musa ajitwalie utukukufu japo alipewa nafasi ya kuwa mungu kwa Haruni.

Jambo hili alilolifanya Musa ni tofauti na alichokifanya katika kitabu cha Kutoka 14:13“Musa akawaambia watu, Msiogope, simameni tu, mkauone wokovu wa Bwana atakaowafanyia leo; kwa maana hao Wamisri mliowaona leo hamtawaona tena milele” ambapo wakati Israeli wanaogopa jeshi la Farao na mbele yao kukiwa na bahari, Musa aliwaambia wasiogope maana Bwana atawafanyia wokovu, hakusema msiogope maana tutawafanyia wokovu. Kwa maana nyingine alitambua kuwa Mungu ndie atendae kupitia yeye (Musa).

Kosa hilo la kutomrudishia Mungu utukufu lilimpelekea kufa katika mlima Nebo kwenye kilele cha Pisga. Matendo 12:23 inatuonyesha wazi kuwa malaika wa Bwana alimpiga mfalme akafa hapo hapo kwa kosa la kutomrudishia Mungu utukufu, “Mara malaika wa Bwana akampiga, kwa sababu hakumpa Mungu utukufu; akaliwa na chango, akatokwa na roho.”

Kutokutii agizo la Mungu

Mungu alimwambia Musa, wakusanye mkutano kisha wewe na Haruni ndugu yako ukauambie mwamba mbele ya macho yao utoe maji yake (Hesabu 20:8). Musa na Haruni hawakulitii agizo la Mungu maana badala ya kuuambia mwamba wao wakaupiga kwa fimbo, “Musa akainua mkono wake akaupiga ule mwamba kwa fimbo yake mara mbili;” (Hesabu 20:11a).

Kumb 32:48-51 “⁴⁸Bwana akasema na Musa siku iyo hiyo, akamwambia,⁴⁹Kwea katika mlima huu wa Abarimu, mpaka kilima cha Nebo, kilicho katika nchi ya Moabu, kuelekea Yeriko; ukaangalie nchi ya Kanaani niwapayo wana wa Israeli kuimiliki;⁵⁰ukafe katika kilima, huko ukweako, ukusanywe uwe pamoja na jamaa zako; kama alivyokufa nduguyo Haruni katika mlima wa Hori, akakusanywa awe pamoja na watu wake⁵¹kwa sababu mlinikosa ninyi juu yangu katikati ya wana wa Israeli katika maji ya Meriba huko Kadeshi, katika bara ya Sini; kwa kuwa hamkunitakasa katikati ya wana wa Israeli.”

Kumbukumbu la Torati imetupa sababu ya na Haruni na Musa kufa, hii yote ni kwa sababu walikosa kumtii Mungu mbele za wana wa Israeli. 1Samweli 15:22b inasema “Angalia, kutii ni bora kuliko dhabihu, Na kusikia kuliko mafuta ya beberu.”

Hatuwezi kumtukuza Mungu kwa namna iwayo yote na kufikia mwisho wetu mwema kama hatutakuwa na utii ndani yetu.

Fuatilia mwendelezo wa somo hili.