NAMNA YA KUKUZA NA KUIMARISHA ROHO YAKO-7

NAMNA YA KUKUZA NA KUIMARISHA ROHO YAKO

 Baada ya safari ndefu ya kujifunza, sasa ndio tunamalizia kipengele cha mwisho

USHIRIKA NA WAPENDWA/WATAKATIFU

Ukiwa na ushirka na wapendwa wengine ni jambo muhimu sana katika kuhakikisha unakua na kuimarika katika maisha ya kiroho. Katika ushirka na watakatifu au wapendwa wengine kuna makundi matatu hivi. (a) watu wa jumuiya moja nikiwa na maana ya kanisa au mwili wa kristo, (b) Marafiki, (c) Baba wa kiroho. Makundi haya ukiyakosa, maisha ya kiroho yanakuwa magumu sana na kwa hiyo ukuaji kiroho unakuwa wa taabu sana.

“Afadhali kuwa wawili kuliko mmoja; Maana wapata ijara njema kwa kazi yao” Muhubiri 4:9

Hakuna mtu anayeweza kujijenga na kujiimarishaa peke yake, ni lazima kuwa katika ushirika na wapendwa wengine, maana ni afadhari kuwa wawili kuliko mmoja, maana watapata ijara njema kwa kazi yao. Sentensi hii inamtazamo kwamba, kazi italeta matokeo mazuri zaidi kama kutakuwa na ushirikiano wa watu wawili kuliko mmoja. Kushiriki na wengine kunaleta ufanisi wa jambo na uharaka wa kufanikisha jambo. Jambo linaweza kumchukua mtu mda mrefu kulifanikisha akiwa peke yake kuliko akishirikiana na mwingine. Na mtu anapokuwa anashiriki mara kwa mara na watu wengine kwenye maswala ya kiroho anakua haraka zaidi kuliko yeye anayekaa peke yake mda wote.

 

“Tena, wawili wakilala pamoja, hapo watapata moto; lakini mmoja aliye peke yake tu awezaje kuona moto?. Hata ikiwa mtu aweza kumshinda yule aliye peke yake, wawili watampinga; wala kamba ya nyuzi tatu haikatiki” (Muhubiri 4:11-12)

Katika safari ya kiroho sio njema kutembea peke yako, unahitaji watu watakao kuwa pamoja na wewe kukutia moyo, kukufariji, kukutia joto, kukufundisha, kukuonesha njia sahihi ya kupita, wa kuvipiga vita pamoja na wa kukusaidia kubeba mizigo. Na Mungu hawezi kukuacha tu peke yako, lazima atakuletea watu kuwa karibu nawe kwa makusudi. Na watu watakaokuja watakuwa katika makundi hayo hapo matatu, na natamani kuelezea moja baada ya lingine.

WATU WA JUMUIYA MOJA AU KANISA

Kusanyiko la kanisa ni muhimu sana kwa ukuaji wa kiroho wa mtu. Nazungumzia kanisa kama kusanyiko la watu walizaliwa mara ya pili na wanaoliitia jina la BWANA kwa moyo safi, Huko unajifunza na wewe namna ya kuliitia jina la BWANA kama wao.

“Wala tusiache kukusanyika pamoja, Kama ilivyo desturi ya wengine; Bali tuonyane; Na kuzidi kufanya hivyo, kwa kadiri mwonavyo siku ile kuwa inakaribia” (Waebrania 10:25)

Biblia inatoa maagizo kwamba tusiache kukusanyika kama ilivyodesturi, kwa maana huko tutaweza kuonyana, na kutiana moyo wakati tunamsubiri Yesu kuja mara ya pili. Kwa kadiri jinsi siku ile inavyokaribia, tunashauriwa kukusanyika pamoja na kuonyana. Neno ‘bali’ linatupa kuona kwamba, tunapaswa kukusanyika zaidi ya desturi yaani kwa lengo maalumu ikiwa ni pamoja na kuonyana. Tunapojumuika na wengine huko tunajifunza namna wengine wanavyofanya, namna wanavyomtafuta BWANA.

Kanisa ni mwili wa Kristo. Penye kusanyiko ambapo ni mwili wa Kristo, ndiyo mahali sahihi kukusanyika. Ukusanyikapo sehemu kama hiyo, unaenda kama mmojawapo wa kiungo katika huo mwili. Utendaji kazi wa kiungo kimoja unategemea sana viungo vingine katika mwili. Kwa maneno mengine inaweza kusemwa kwamba, udhihirisho wa kiungo kimoja, unategemea kiungo kingine, na kazi yake inakuwa na matunda kwa msaada wa kiungo kingine katika mwili mmoja. Kwa mfano, ili mikono iweze kufanya kazi kubeba na kuhamisha kitu, inahitaji macho yanayoweza kuona sawa sawa kitu chenyewe na miguu ya kumpeleka mahali kitu kilipo. Kazi ya mikono itakuwa ina matunda kama msaada wa miguu na macho utakuwepo kupeleka hicho kitu kinapotakiwa. Kazi ya mikono inakuwa malidhawa kwa sababu ya msaada wa viungo vingine katika mwili. Ndivyo hivyo hata katika mwili wa Kristo, mtu hawezi kujiimalisha peke yake bila kujumuika na kupata msaada wa wengine. Inapaswa kujumuika sio tu kama desturi bali kwa sababu ni muhimu.

“Maana kama vile mwili ni mmoja, nao una viungo vingi, na viungo vyote vya mwili ule, navyo ni vingi, ni mwili mmoja; vivyo hivyo na Kristo. Kwa maana katika Roho mmoja sisi sote tulibatizwa kuwa mwili mmoja, kwamba tu Wayahudi, au kwamba tu Wayunani; ikiwa tu watumwa au ikiwa tu huru; nasi sote tulinyweshwa Roho mmoja. Kwa maana mwili si kiungo kimoja, bali ni vingi. Mguu ukisema, Kwa kuwa mimi si mkono, mimi si wa mwili; je! Si wa mwili kwa sababu hiyo? Na sikio likisema, Kwa kuwa mimi si jicho, mimi si la mwili; je! Si la mwili kwa sababu hiyo? Kama mwili wote ukiwa jicho, ku wapi kusikia? Kama wote ni sikio ku wapi kunusa? Bali Mungu amevitia viungo kila kimoja katika mwili kama alivyotaka” 1 Wakorintho 12:12-18

Wako watu wanaosema kwamba sio muhimu kukusanyika pamoja kwa sababu hata nyumbani Mungu anamsikia akiomba. Hii ni ishara ya kutawaliwa na roho nyingine isiyo ya Kristo Yesu. Maana sisi kwa Roho mmoja tulibatizwa KUWA MWILI MMOJA. Roho wa Mungu tuliyempokea ndiye aliyetufanya kuwa mwili mmoja, na hauwezi kujitawanya alafu ukabaki salama. Kiungo kimoja kinapokosekana katika mwili, mwili unaitwa mlemavu, na wala kiungo hakiwezi kuwa na uhai tena na kufanya kazi iliyokusudiwa. Kiungo kinaitwa ‘waste’ kwa sababu kinakuwa hakina kazi tena kwa sababu uhai wake unategemea uhai wa mwili kwa roho iliyo ndani ya mwili. Kwa hiyo inatupasa kukusanyika kwa kuwa sisi tu sehemu ya mwili mmoja, kuimarika kwetu kunategemea kusanyiko hilo.

Sababu nyingine inayotufanya tukusanyike ni kwamba kila mtu amepewa kipawa chake. Hiki kipawa kinatumika katikati ya kusanyiko, na ili kukifaidi ni lazima uwe sehemu ya kusanyiko.

“Naye aliyeshuka ndiye yeye aliyepaa juu sana kupita mbingu zote, ili avijaze vitu vyote. Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu; kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo; ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu” Waefeso 4:10-14

Mungu aliamua kuweka vipawa mbalimbali ndani ya mwili wa kanisa, akijua kabisa ujumla wa vipawa hivyo ndiyo unaoweza kuwaimarisha watakatifu wake. Aliwafanya wengine kuwa mitume, manabii, wainjilisti, wachungaji na waalimu kwa kusudi la:- a) Kuwakamilisha watakatifu, b) Kazi ya huduma itendeke, c) kuujenga mwili wa kristo. Kwa hiyo kukamilishwa kwa mtu na kujengwa kwa mwili wa Kristo kunategemea vipawa vya watu wengine ndani ya kanisa (mwili wa kristo). Na hapa iko wazi kwamba hivyo vipawa vitaendelea kufanya kazi hata tutakapoufikia umoja wa imani, kumfahamu sana mwana wa Mungu na kuwa mtu mkamirifu kwenye cheo cha utimilifu wa Kristo. Ni wazi kwamba mtu hataweza kufikia ukamilifu katika kiimo cha utimilifu wa Kristo, bila vipawa hivi walivyonavyo watu wengine ndani ya kanisa. Kwa hiyo kuwa kwenye kusanyiko la kanisa sio chaguo (optional), ni kitu cha lazima kama unataka kukua na kuimalika. Hata kama unajitahidi sana kusoma biblia kuna mambo huwezi elewa peke yako, kuomba sana, kuna mambo huwezi yapata ukiwa peke yako. Biblia inasema “Tena nawaambia, ya kwamba wawili wenu watakapopatana duniani katika jambo lo lote watakaloliomba, watafanyiwa na Baba yangu aliye mbinguni” (Math 18:19), kuna mambo ambayo Mungu hayafanyi isipokuwa imepatana kuanzia wawili.

Natamani ujue ili kwamba “Lakini kila mmoja hupewa ufunuo wa Roho kwa kufaidiana” (1 Wakor 12:7). Mungu akimpa mtu kipawa au ufunuo sio kwa ajili yake bali kwa ajili ya kuwafaidia wengine. Kama Mungu amekufanya mchungaji au mwalimu, sio kwa ajili yako bali kwa ajili ya kuwafaidia wengine. Ukweli huu utakufanya utafaute watu wengine ambao utakukuwa unawachunga na kuwafundisha, kwa sababu kipawa chako kitaendelea kukua na kuimarika kwa kadiri unavyoendelea kukitumia. Unapojua kuwa vipawa vilivyo ndani ya kanisa sio kwa ajili ya hao walionavyo bali kuwafaidia wengine ndani ya kanisa ikiwa ni pamoja na wewe kama ukiwa ndani yake, itakufanya ufanye bidii kukusanyika ili kuweza kuvifaidi. Kimsingi ndio maana hatutakiwi kuoneana wivu kwa sababu ya hizi  karama na vipawa, kwa sababu walionavyo wamepewa kwa ajili ya wale wasionavyo na sio kwa ajili yao. Mwalimu amewekwa na Mungu ili wewe ujifunze siri za Mungu, kumwonea wivu na kumchukia ni kumwambia Mungu sitaki kujifunza neno lako.La hakika ni kwamba, yale yote ambayo Mungu huyaweza ndani ya kusanyiko, mtu hawezi kuyapata kama haudhurii kwenye hilo kusanyiko.

Muhimu kukumbuka kwamba, Sio kila sehemu ni mahali sahihi kukusanyika. Kama nilivyotangulia kusema, kusanyiko unalojuika nalo ndilo lenye nguvu ya kukuimarisha kiroho kwa sababu ya mambo yanayotukia huko. Lakini pia kusanyiko lina nguvu ya kukubomoa na kukuangamiza. Kwa hiyo ni muhimu kuangalia aina sahihi ya kusanyiko unalotaka kujumuika nalo. Kwa sababu mambo yanayofanyika hapo ndiyo yatakayosukuma mwelekeo wa maisha yako.

“Kwa maana mbwa wamenizunguka; Kusanyiko la waovu wamenisonga; Wamenizua mikono na miguu” Zaburi 22:16

Daudi aliona kusanyiko la waovu limemzingira, na kazi yao kubwa ilikuwa ni kumfunga mikono na miguu yake asiweze kupiga hatua na kufanya kazi impasayo. Kuna mahali pengine ukienda kukusanyika, yaani ndiyo unadidimia kabisa kwa sababu ya aina ya mambo yanayofanyika hapo mahali.Muhimu kuwa mahali ambao unajua utakula, kunywa na kufaidi kazi za wengine.

MARAFIKI

Kabla ya kuona mchango wa rafiki kwenye kuimarisha roho ya mtu na maisha ya kiroho, ni muhimu tukaelewa kwa nini maana ya rafiki kiblia. Yesu aliwahi kusema maneno ambayo yanatupa kuelewa kwa undani jambo hili,

“Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake. Ninyi mmekuwa rafiki zangu, mkitenda niwaamuruyo.  Siwaiti tena watumwa; kwa maana mtumwa hajui atendalo bwana wake; lakini ninyi nimewaita rafiki; kwa kuwa yote niliyoyasikia kwa Baba yangu nimewaarifu” Yohana 15:13-15

Kutoka katika maneno haya tunaweza tukaona vinavyomfanya mtu kuitwa rafiki:-

Upendo

Ni lazima kuwepo na upendo kati ya marafiki, na huo upendo unatakiwa ule wa kiwango cha juu, kuutoa uhai kwa ajili ya rafiki. Yesu anasema hakuna aliye na upendo mwingi  kuliko huu alafu anautaja kwamba wa mtu kuutoa uhai wake kwa ajili ya rafiki yake, kwa hiyo kwa mtu kuutoa uhai wake ndiyo kiwango cha mwisho cha upendo. Hii ina maana kwamba rafiki wanatakiwa kupendana kwa maisha yao. Kulindana kwa maisha yao. Hii tunaiona kwenye urafiki wa Yonathani na Daudi. Yonathani alimpenda Daudi kuliko nafsi yake, yaani alikuwa tayari kuutoa uhai wake kwa ajili ya Daudi kwa sababu uhai wa rafikiye ulikuwa na thamani kuliko wake. Yonathani ndiye alikuwa mrithi wa kiti cha kifalme baada ya baba yake Sauli, lakini kwa sababu ya rafiki yake Daudi aliamua kuachana na nafasi na heshima. Kilichomfanya kuahirisha maisha hayo ya juu na heshima katika nchi ni upendo aliokuwa nao kwa Daudi rafiki yake. Alikuwa tayari kumtetea kwa baba yake na kuhatarisha maisha yake kwa ajili ya rafiki yake.

Lugha moja

Rafiki ni yule ambaye mnaongea lugha moja. Lugha moja ndiyo inayofanya kutembea njia moja na kutenda kitu kimoja. Rafiki ni yule ambaye unaelewana katika usemi na matendo. Yesu anasema mkitenda niwaamuruyo, mmekuwa rafiki zangu. Kutenda amuruyo ni kwa sababu tumekubaliana naye. Anayeweza kukubaliana na wewe na kufanya utakalokuifanya, kwa kukuunga mkono, ndiye rafiki. Haiwezekani mtu akawa rakini lakini hampata katika maneno, mnayokubaliana hamtendi kwa pamoja. Biblia inasema “Je! Watu wawili waweza kutembea pamoja, wasipokuwa wamepatana?” (Amosi 3:3) kutembea pamoja ni matokeo kupatana. Kufanya kile Yesu alichokiagiza, ndicho kinadhihirisha urafiki wetu.

Kujua siri

Yesu amesema wazi katika mistari hii kwa nini hatuiti watumwa bali rafiki kwa sababu tumeshajariwa kuzijua siri za Bwana wetu. Rafiki ni yule ambaye unaweza kumshirikisha na kumwambia siri zako na yeye akakwambia zake. Ni yule ambaye yeye yuko wazi kwako na wewe wazi kwake. Kwa sababu huwezi kumfunulia siri zako kila mtu, basi huyo rafiki anatakiwa kuwa mtu mwaminifu mwenye kicho cha Mungu na msiri wa siri za Mungu na rafiki yake. Ambaye hawezi kutoa nje siri za mwenzake la sivyo hakidhi kigezo cha kuwa rafiki. Taarifa za ndani zinatakiwa zitoke kwa ruhusa ya wote wawili. Ndio maana Mungu hafunui siri zake kwa kila mtu bali kwa wale anaowaamini, rafiki zake ambao ndio wanaomcha. Biblia inasema “Mtu na atuhesabu hivi, kuwa tu watumishi wa Kristo, na mawakili wa siri za Mungu” (1 wakorintho 4:1). Mtu ambaye unamshirikisha siri zako, inamaana unamshirikisha maisha yako. Kuna wakati ambao unaweza ukawa unapitia changamoto za maisha, na hukutaka watu wengi wajue lakini unahitaji msaada katika ilo, unatakiwa kuwa na rafiki utakayemshirikisha hilo jambo na kusimama na wewe. Kuna wakati unahitaji mtu ambaye atakuelewa vizuri katika mazingira unayopitia na kukusaidia kuvuka vizuri. Na huyo anatakiwa kuwa rafiki. Huchukui tu kila mtu na kumwuita rafiki. Rafiki lazima umpime na kurithika naye kabla hujawa karibu naye.

Katika mambo haya matatu, tunaona wazi sawa na biblia inavyosema kwamba “…..rafiki yako aliye kama moyo wako…” (Kumb 13:6). Anakupenda kwa maisha yake, kutunza na kukusaidi kwenye madhaifu yako, kutunza siri zako na kwenda njia moja (kupatana na kuelewana). Rafiki ni kama maisha yako. Kutokana na ukweli huu, ni muhimu kuchagua rafiki ambaye atakuwa na tabia unazotaka, na mwelekeo unaotazamia kuuendea. Kwa sababu mwelekeo anaouendea uwezekano ni mkubwa ukauendea huo. Biblia inasema “Enenda pamoja na wenye hekima, nawe utakuwa na hekima; Bali rafiki wa wapumbavu ataumia.” (Mithali 13:20), kwa hiyo ni muhimu kujua aina ya rafiki unayetaka, mpumbavu au mwenye hekima.

“Lakini zikimbie tamaa za ujanani; ukafuate haki, na imani, na upendo, na amani, pamoja na wale wamwitao Bwana kwa moyo safi”. 2 Timotheo 2:22

Unapotaka kuimarika kiroho, ni muhimu ukachagua rafiki wa kuambatana naye ambaye anamwita Bwana kwa moyo safi. Tumeitwa katika utakatifu ili tuingie katika ushirika wa mwana wa Mungu. Tunatakiwa kuishi maisha yaliyotengwa na kuwa mbali na tamaa za ujanani (dunia). Ili kuwa salama na kuhakikisha mbegu iliyo ndani yako ya utakatifu inakuwa bila haiharibiwa , ni vyema kuwa na watu ambao wanakuwa na aina ya maisha au ambao wanaishi kama wewe- wanaokataa tamaa za ujanani (dunia) na kumwita Mungu kwa moyo safi. Mtu ili aimarike kiroho anahitaji rafiki ambaye anamwita Bwana katika usafi wa moyo, kwa sababu naye ndani yake atakuwa na hali ya kukataa dhambi, lakini pia lugha zenu zinakuwa zinafanana. Mungu anaruhusu rafiki wa namna hii ili akuimarishe kiroho katikakutengeneza tabia za kimungu.

Mara unapookoka, alafu ukajitenga bila kushirikiana na wale waliokoka, ni rahisi sana kwa sababu hutaweza kusimama peke yako. Unahitaji mtu atakayekufundisha neno kwa karibu, mtu ambaye mtajumuika naye kwenye maombi mara kwa mara. Maandiko yanasema katika Mithali 27:17:-

“Chuma hunoa chuma; Ndivyo mtu aunoavyo uso wa rafiki yake”

Kama vile chuma unavyoweza kunoa chuma, ndivyo ambavyo Mungu kaweka marafiki ili kunoa rafiki zao, kuwaimarisha, kuwajenga rafiki zao kuhakikisha kwamba nao wanakuwa imara kama wao. Marafiki kwa jinsi hii ni nzuri sana, kwa sababu katika safari yenu kuna mambo ambayo Mungu atayafunua kwako na kukufundisha lakini sio kwa rafiki yako wakati huo huo rafiki yako naye anafunuliwa mengine na kufundishwa. Kwa kushirikiana, uliyofundishwa wewe na rafiki yako, yanawajenga kwa pamoja. Mambo ambayo yangekugharimu muda mrefu kuyafahamu, mnafanikiwa kuyajua kwa mda mfupi. Ndio maana napenda kuwa karibu na rafiki zangu, tunalishana tu neno la Mungu kwa wengi.

Kama nilivyotangulia kusema hapo juu kwamba rafiki ni yule anayekupenda kwa uhai wake (maisha), kwa sababu rafiki anatakiwa kudhihirisha kiwango cha juu kabisa cha upendo. Rafiki wa aina hii hahesabu mabaya wala makosa yako ufanyapo, anaweza kuchukuliana na wewe katika udhaifu ulionao, na kutafuta namna ya kukusaidia ili kutoka katika makosa hayo na kutokurudia makosa yale yale. Unahitaji rafiki ambaye atakuelewa na kukusaidia katika makosa uliyofanya ambayo kwa kweli kila mtu asingitamani kuwa karibu na wewe kwa sababu wamepoteza tumaini nawe kabisa katika wokovu wako.

Nina rafiki yangu ambaye katika safari tuliyonayo ya wokovu, aliteleza na kuanguka katika dhambi. Watu wengine hawakutaka kuwa karibu naye tena, walimwona mkosaji sana kuliko wao, imani yao juu yake ikapotea, naye akajua hapa ndio basi pamoja na utumishi wake, na kuachana na wokovu. Kama rafiki ikabidi nikae na kuzungumza naye, na kumweleza upendo wa Yesu. Kuanguka sio mwisho wa safari ila ukiamua unaweza ukaufanya mwisho wa safari. Niamsaidia namna ya kurudi kwa Mungu tena kwa toba na kuendelea na safariya wokovu. Haleluya! Mungu yuko tayari kusamehe ila tu usirudie makosa yale yale.

Wengi wamepotea kabisa kwa kukosa marafiki wa kuwaelewa katika hali zao na wakuwasaidia kurudi kwa Mungu na kuendelea na safari.

“Kwake huyo atakaye kuzima roho inapasa atendewe mema na rafiki; Hata kwake huyo aachaye kumcha Mwenyezi” Ayubu 6:14

Sijui kama unaona, Mungu anakupa marafiki ili, wakati roho yako inataka au ndiyo inazimia, akutendee mema na kukurudisha tena tena kwenye hali yako ya mwanzo. Anakupa ili kwamba utakapo kumwacha Mungu, akutendee mema yaani kukurudisha tena. Ayubu kilimsumbua sana, alitegemea hayo toka kwa rafiki zake walipokuja kumtembelea alipokuwa katika magonjwa na adha, na shida nyingi, lakini rafiki zake walimkandamiza zaidi na kumwona mkosaji. Ndivyo wapendwa wengi walivyo, badala ya kumsaidia kumsimaisha mtu aangukapo, ndio wanamkakandamiza na kumtenga kabisa. Tuwapende hao na kuwasaidia. Hii ndio maana ya kuwa rafiki.

BABA WA KIROHO

Katika mbio za wokovu ni muhimu kuwa na baba wa kiroho, baba wa kiroho simaanishi tu yule ambaye alikuhubiria ukaoka, bali pia yule ambaye anatakiwa kuwa pamoja na wewe kuhakikisha unakua katika neema ya kristo na katika Kujua Mungu. Baba wakiroho simaanishi tu wanaume bali na mwanamke pia.

Kuwa na baba wa kiroho ni muhimu sana katika maisha. Yeye ndiye mwenye kwa kiasi kikuwa amekutangulia hatua kadhaa, kule unakoelekea yeye alishapita tayari. Kuwa naye, anakupa na kukuonyesha njia sahihi ya kuiendea, kukupa mwanga unapokuwa katika giza, kujibu maswali yako yanayokutatiza.

Kazi kubwa ya baba ya kiroho ni kuhakisha anaacha ndani ya mtoto alama yake, ili mtoto awe kama yeye. Anakazi ya kutengeneza tabia ndani ya mtoto zitakazomsaidia kuishi ipasavyo hata kama baba yake hayupo. Hii ndiyo kazi kubwa aliyokuwa nayo Yesu kwa wanafunzi wake, alikuwa baba wa kiroho kwao (a mentor), kuwafundisha wanafunzi wake, kujenga imani ndani yao, kuwapa nuru walipokuwa gizani, kuwaonesha njia sahihi ya kuiendeana kufanya mambo, kujibu maswali waliyokuwa nao.

“basi, wakati huo Bwana akamwita Samweli; naye akasema, Mimi hapa Akamwendea Eli kwa haraka, akasema, Mimi hapa; kwa maana uliniita. Akasema, Sikukuita; kalale tena. Naye akaenda, akalala tena.  Bwana akaita mara ya pili, Samweli! Samweli! Akaondoka akamwendea Eli, akasema, Mimi hapa; kwa maana uliniita. Akajibu, Sikukuita, mwanangu; kalale tena. Basi Samweli alikuwa hamjui Bwana bado, na neno la Bwana lilikuwa bado halijafunuliwa kwake. Bwana akamwita Samweli mara ya tatu. Naye akaondoka akamwendea Eli, akasema, Mimi hapa; kwa maana uliniita. Ndipo Eli akatambua ya kuwa Bwana ndiye aliyemwita yule mtoto. Kwa hivyo Eli akamwambia Samweli, Enenda, kalale; itakuwa, akikuita, utasema, Nena, Bwana; kwa kuwa mtumishi wako anasikia. Basi Samweli akaenda akalala mahali pake. Bwana akaja, akasimama, akaita vile vile kama kwanza, Samweli! Samweli! Ndipo Samweli akasema, Nena, Bwana; kwa kuwa mtumishi wako anasikia. Bwana akamwambia Samweli, Angalia, nitatenda tendo katika Israeli, ambalo kila atakayelisikia masikio yake yatamwasha” (1 Samweli 3:4-11)

Baba wa kiroho ndiye anayeweza kumsaidia mtu kuelewa kufanya vizuri kile asichokijua. Samweli alikuwa hajaijua sauti ya BWANA bado, na kama angekuwa peke yake siku ile au bila baba wa kumlea, kulikuwa na uwezekano mkubwa kutokuielewa na kushindwa kuitambua sauti ya Mungu. Lakini Eli kwa kuwa yeye amekuwa katika utumishi, alielewa sauti iliyokuwa na inamuita Samweli akamsaidia.

Kwa kuwa baba wa kiroho amekuwa hatua nyingi mbele yako, anakuwa na wewe kukuleta kuyashiriki mambo mageni ambayo hujawahi kuyapitia na kuonja kule ambako bado hujafika. Hili tunajifunza pia kwa Yesu alipowachukua baadhi ya wanafunzi wake na kuwaleta katika mlima wa mabadiliko (Mathayo `17:1-9), ili kwamba waweze kuuona na kuushiri utukufu ule.

Wako watu wanaosema wao hawahitaji baba wa kiroho (a mentor), lakini Mungu amewaweka hao katikati yetu, ili tuweze kuwafaidi. Makosa ambayo wao waliyafanya tusiyafanye sisi. Hakuna haja ya kupasua miamba wakati wengine walishapasua kwa ajili yako. Kama unaye usimwache akaenda zake, kama hauna muombe Mungu akupe mmoja.

Kuanzia mwanzo, tumekuwa tukijifunza namna ya kukuza na kuimarisho roho yako, na nimejaribu kuelezea mambo makuu manne ya msingi katika kuimarisha roho yako, nayo ni neno la Mungu, kusifu na kuabudu, maombi na ushirika na watakatifu.  Mambo haya ukiyazingatia na kuyaweka katika matendo kwa uaminifu, utakuwa na kuimarika kwa kasi sana.

MWISHO