NAMNA YA KUKUZA NA KUIMARISHA ROHO YAKO- 6

NJIA YA KUPAINGIA PATAKATIFU

Tunaendelea na mwendelezo wetu, juu ya namna ya kukuza na kuimarisha roho yako. Karibu tuendelee.

Mambo haya waliyokuwa wanayafanya akina Musa yalikuwa ni kivuli cha mambo yatakayokuja baadaye (wakati huu wa sasa). Ingawa Mungu kwa rehema zake, alikuwa akijidhihirisha kwa Israeli pale hema ya kwanza ilipokuwa ikisima, lakini njia ya kupaingia patakatifu ilikuwa haijadhihirishwa bado. Waebrania inatuambia;-

“Roho mtakatifu akionyesha neno hili, ya kwamba njia ya kupaingia patakatifu ilikuwa haijadhihirishwa bado, hapo hema ya kwanza ilipokuwa ingali ikisimama, ambayo ndiyo mfano wa wakati huu uliopo sasa; wakati huo sadaka na dhabihu zinatolewa, zisizoweza kwa jinsi ya dhambi kumkamilisha mtu aabuduye” Waebrania 9:8-9

Patakatifu panapotajwa kwenye hii waebrania ni tofauti na ile iliyokuwa kwenye hema ya kukutania wakati wa akina Musa. Kwenye hii waebrania inapataja patakatifu pa mbinguni kabisa, ile ya akina Musa ilikuwa kwa jinsi ya mwili. Ilikuwa sio halisi bali kivuli cha ile ya mbinguni. Na maadamu ile ilikuwa bado inasimama, basi hii nyingine ilikuwa bado kudhihirishwa. Njia ya kupaendea patakatifu kabisa pa mbinguni ilikuwa bado haijadhihirishwa. Ile kusema njia ya kupaingia patakatifu ilikuwa bado haijadhihirishwa ina maana watu walikuwa hawana uwezo wa kupaingia patakatifu (access to the Holy place). Patakatifu palikuwepo lakini watu walikuwa hawana uwezo wa kupaingia.

Hapo patakatifu pa patakatifu pa mbinguni, palipo na madhababu na kiti cha rehema, ndipo Mungu alipoweka nafasi yetu ya kuwepo hapo kwa ajili ya kutoa ibada na maombi. Lakini mwanadamu hakuwa na uwezo huo wa kusogea hapo, biblia inasema kwa sababu ya “dhambi” na kwa sababu dhabihu na sadaka zilizotolewa hazikuweza kushughurikia hiyo dhambi na kumkamilisha aabuduye. Dhambi ndiyo iliyokuwa kiambaza, na hii ilikuwa inawakilishwa na ile pazia iliyotenganisha patakatifu na Patakatifu Pa Patakatifu pale hema ya kwanza iliposimama.

Kuhani mkuu alikuwa akiingia mahali patakatifu kutoa dhabihu na sadaka tena mara moja kwa mwaka kwa sababu ya kumbukumbu la dhambi, hakuweza kuwafungulia wengine waingie mahali patakatifu. Kuhani mkuu mwenyewe alipata nafasi ya kupaingia mahali patakatifu kwa sababu ya ile sadaka ya dhambi ya kila mwaka. Dhambi (pazia) ilijenga kiambaza na kuwazuia watu kuingia mahali patakatifu pale hema ya kwanza ilipokuwa ikisimama, dhambi ndiyo iliyozuia kupaingia mahali patakatifu pa mbinguni pasipotengenezwa kwa mikono ya wanadamu ingawa hapo ndipo Mungu anapotuhitaji tuonekane.

Ili kuingia patakatifu pa patakatifu mbinguni ilihitajika sadaka ambayo ingeweza kushughuria dhambi na kutufungulia mlango kupaingia hapo na ilihitajika kuhani mkuu kufanya hiyo sadaka.

“Kristo alipokuja akiwa Kuhani Mkuu wa mambo mema ambayo tayari yameshawasili, alipitia kwenye hema iliyo kuu zaidi Na bora zaidi, ambayo haikujengwa Kwa mikono ya binadamu, hii Ni kusema, ambayo si sehemu ya uumbaji huu. Hakuingia Kwa njia ya damu ya mbuzi Na ya ndama, lakini aliingia Patakatifu pa Patakatifu mara moja tu Kwa damu yake mwenyewe, akiisha kupata ukombozi wa milele.” Waebrania 9:11-12

Haruni kama kuhani mkuu alikuwa akiingia mahali patakatifu palipotengezwa na mikono ya wadamu akiwa na sadaka na dhabihu za mbuzi na mafahali ambazo hata hivyo hazikuweza kumkamirisha yeye aabuduye na kumleta karibu na Mungu lakinii Yesu kama kuhani mkuu aliingia mahali patakatifu mara moja tu, sio kwa damu ya mbuzi na ya ndama bali kwa damu yake mwenyewe. Biblia inaongeza kuwa aliingia mahali patakatifu akiisha kufanya ukombozi wa milele. Hii inatupa kuona kwamba sadaka ya Yesu ilikuwa na kusudi la kushughurikia kile kilichokuwa kiambaza cha kuingia mahali patakatifu. Sadaka ya akina Haruni iliweza kutakasa watu kwa jinsi ya mwili, kwa hiyo ilihitajika sadaka ambayo inaweza kushughurika roho na dhamiri za watu ili sasa waweze kutoa ibada katika mahali patakatifu pa mbinguni kwa sababu tunapafikia hapo kwa roho zetu.

“Basi si zaidi sana damu ya Kristo, ambaye kwa Roho wa milele alijitoa nafsi Yake kwa Mungu kuwa sadaka isiyo na waa kutusafisha dhamiri zetu, kutokana na matendo yaletayo mauti, ili tupate kumtumikia Mungu aliye hai!” Waebrania 9:14

Damu ile ambayo Yesu aliingia nayo mahali patakatifu ilikuwa na lengo la kushughuria roho na dhamiri zetu kuzitakasa ili tuweze kupaingia mahali patakatifu kumwabudu Mungu aliye hai. Damu inatuweka tayari kutoa ibada kwa Mungu. Ndiyo maana ilimpasa kabla ya kuingia katika madhabahu ya mbinguni ilipasa kufanya ukombozi wa watu ili yeye atoapo dhabihu ya damu yake wale aliowakomboa wawe na nafasi ya kupaingia mahali patakatifu kama yeye. Kwa sababu dhambi ndiyo ilikuwa kiambaza, ilimpasa ukifunje hicho kiambaza ili wale aliowakomboa waweze kuingia mahali patakatifu. Biblia inasema alikivunja hicho kiambaza kwa “mwili” wake (Waefeso 2:15). Mwili wake uliotolewa msalabani ulikwa kwa ajili ya kushughuria dhambi iliyotutenga sisi na Mungu, iliyofanya uadui na kutufanya sisi tusiwe na uwezo wa kupaingia mahali patakatifu pa mbinguni ili wakati huu tuweze kupaingia.

“Kwa hiyo, ndugu zangu, kwa kuwa tunao ujasiri wa kupaingia Patakatifu pa Patakatifu Kwa damu ya Yesu, Kwa njia mpya iliyo hai tuliyofunguliwa Kwa ajili yetu kupitia kwenye lile pazia, yaani, MWILI Wake”. Waebrania 10:19-20

Njia mpya ya kupaingia Patakatifu pa Patakatifu tumekwishwa kufunguliwa wakati huu inayopita katika pazia yaani MWILI wake. Mwili wake ndiyo njia ya kupaingia mahali patakatifu. Elewa vizuri hapa, hatutumii damu ya Yesu kama njia ya kupaingia Patakatifu pa Patakatifu bali tunatumia mwili wake kama njia, lakini damu ya Yesu inatupa ujasiri wa kupita kwenye hiyo njia na kupaingia Patakatifu pa Patakatifu. Ndiyo maana pazia la hekalu halikupasuka wakati damu yake inatoka bali wakati mwili wake unatolewa sadaka msalabani – roho yake ilipoachana na mwili wake. Kifo chake ndicho kilichoifisha dhambi na sisi tukapata nafasi ya kupaingia patakatifu pa patakatifu.

“Kwa maana Kristo hakuingia kwenye patakatifu palipofanywa kwa mikono ya mwanadamu, ambao ni mfano wa kile kilicho halisi. Yeye aliingia mbinguni penyewe, ili sasa aonekane mbele za Mungu kwa ajili yetu.” Waebrania 9:24

Yesu alipaingia Patakatifu pa Patakatifu penyewe pa mbinguni ili aonekane mbele za Mungu kwa ajili yetu. Naye alipaingia kama mtangulizi wetu, mahali hapo ndipo tunapotakiwa kuwa wakati wa maombi. “Kwa maana kwa yeye sisi sote tumepata njia (yaani mwili wake) ya kumkaribia Baba katika Roho mmoja” (Efeso 2:18). Kumkaribia mahali alipo ili tuonekane mbele zake, kwa maana katika Kristo sisi tuliokuwa mbali hapo kwanza tumekuwa karibu kwa damu ya Yesu (Efeso 2:13).

KUOMBA KATIKA ROHO

Mungu hatamani wakati unaomba uombee ukiwa mbali bali anataka ukiwa karibu yaani uonekane mbele zake kazi. Kwa kuwa Mungu ni Roho basi tunaweza kuonekana mbele zake kwa roho zetu katika maombi. Wakati wa kuomba sio miili yetu inayohudhuria mbele za BWANA bali roho zetu. Na ili maombi yawe na matokeo mazuri basi ni muhimu kuomba katika roho. Nina mkumbuka mama mmoja ambaye alikuwa hana mtoto mda mrefu, ambapo naamini alikuwa akimwomba Mungu kwa sababu alikwa na kawaida ya kwenda nyumbani mwa BWANA mara kwa mara. Lakini siku moja alipoenda nyumbani mwa BWANA kama ilivyo desturi kitu kipya kikatokea alipoona abadilishe namna ya kuomba mpaka kuhani akafikiri amelewa;- “Basi Hana alikuwa akinena MOYONI mwake, midomo yake tu ilionekana kama anena, sauti yake isisikiwe, kwa hiyo huyo Eli alimdhania kuwa amelewa……..Hana akajibu….nimeimimina roho yangu mbele za BWANA” 1 Samweli 1:13-15

Hana midomo yake haikutoa sauti lakini moyo wake ulikuwa unapaza sauti mbele za Mungu, Moyo wake ulikuwa mbele za Mungu ukiomba, akiwa ameumimina moyo wake. Hana aliyafanya mambo mawili; kuomba kwa roho na kuomba kwa moyo wake wote. Kuomba kwa moyo wote ndiyo maana ya kuumimina moyo kwa Mungu. Hii ndiyo inayoonesha kwamba unachokiomba unakihitaji kwa moyo wako wote. Sio nusu unahitaji nusu hauhitaji.

Tunatakiwa kuelewa kwamba kinachoingia katika madhababu ya mbinguni, sehemu ya Patakatifu pa Patakatifu sio mwili bali roho. Roho zetu ndizo zinatakiwa zionekane mbele za Mungu zikiomba. Ndio maana hapo juu nilikuwa najaribu kukuonesha wapi tunasimama wakati wa kuomba (where we stand in prayers) mbele za Mungu. Kwa hiyo kila unapotaka kuomba, hakikisha kwamba unaonekana mbele za Mungu kwa roho yako katika Patakatifu pa Patakatifu.

Kuomba kwa roho haimaanishi ni kunena kwa lugha tu, unaweza usinene kwa lugha na roho yako ikawa inaomba. Kinachotakiwa unachokiomba kiwe kinatokea rohoni mwako.

“Bali wewe usalipo, ingia katika chumba chako cha ndani, na ukiisha kufunga mlango wako, usali mbele za Baba yako aliye sirini; na Baba yako aonaye sirini atakujazi” Mathayo 6:6

Zaburi ya 91:1 inapotuambia “Aketiye mahali pa siri pake Aliye juu Atakaa katika uvuli wake Mwenyezi” tunapata kujua kwamba mahali pa “siri” ni mahali pa makao ya Mungu au uweponi mwake. Mtu anapoambia “...Usalipo mbele za Baba yako aliye siri...” ni wazi kwamba yeye mwenyewe anahitajika mahali hapo pa “siri” ili aweze kuomba mbele za Baba. Kwa sababu huwezi kuwa mbele za mtu na usiwepo mahali alipo. Hapo mahali pa “siri”, roho tu ndiyo inaweza kuhudhuria na sio mwili. Kwa hiyo anaposema “ingia katika chumba chako cha ndani” anamaanisha kuwa katika roho yako na kusahau kwa mda habari ya mambo ya mwili. Kuachana na fikra, mawazo, na chochote kinachoweza kukuzuia kuwa mbele za Mungu kuomba. Hiki ndiyo alichokuwa anakifanya Hana alipokuwa akiomba. La muhimu ni kuhakikisha kwamba unakuwa na mazingira mazuri ya kuomba.

KUNENA KWA LUGHA

Ingawa hata usiopo omba kwa kunena kwa Lugha, lakini ni muhimu sana mtu kwa mtu kuomba kwa kuneno kwa Lugha. Najua wako wengine ambao hawaamini katika kunena kwa lugha lakini nachojuaribu kuelezea hapo ni kile neno la Mungu linatufundisha.

Kuna mambo kadhaa nataka uone:-

Mtu anaponena kwa lugha, roho yake huomba kwa Roho mtakatifu, ikiwa na maana yale maneno anayojaliwa mtu kutamka, ni kwa roho yake yanatamkwa. Kwa hiyo mtu anakuwa na uhusika wa moja kwa moja.

“Maana nikiomba kwa lugha, roho yangu huomba, lakini akili zangu hazina matunda” 1 Wakorintho 14:14

Akili inakuwa haielewi kile ambacho roho inaomba lakini roho yenyewe inaelewa na Mungu pia anaelewa. Kumbuka kwamba yale maneno yanayotamkwa yanakuwa na msukumo wa Roho mtakatifu. Kunena kwa lugha ni njia moja wapo ya kufunga milango uingiapo sehemu ya ndani. Mambo yote yanayokuwa yanaendelea akili zako zinakua hazielewi hii inaifanya kutuliza akili zako.

Kwa kunena kwa Lugha, unapata nafasi ya kuyaombea mambo ya siri yaliyofichika. 

“Maana yeye anenaye Kwa lugha, hasemi Na watu, bali husema na Mungu; maana hakuna asikiaye; lakini anena mambo ya siri katika roho yake” 1 Wakorintho 14:2

Kuna wakati ambao, akili zako haielewi wala kujua baadhi ya mambo lakini roho yako inayajua na kuyaelewa. Unaweza tu kuomba kwa lugha ya kibinadamu pale tu akili ya mtu inapoweza kulielewa jambo.  Kwenye mstari huu tunaona kwamba yeye ananaye kwa lugha hasemi na watu bali anasema moja kwa moja na Mungu kwa roho yake. Pia tunaona kwamba ananena mambo ya siri ikiwa na maana ya mambo yaliyofichika katika akili za kibinadamu. Kuna mambo ambayo roho yako inakuwa imeyaona lakini akili yako bado haijayaelewa. Kwa kunena kwa lugha, unaweza kuyaombea hayo mambo hata pale ambapo akili yako inakuwa bado haijayaelewa na Mungu akashughurikia.

Kwa kunena kwa lugha, unaweza kupata ufahamu juu ya mambo ya sirini usiyoyajua bado. Mtu anaponena kwa lugha, roho yake huomba katika Roho mtakatifu, yaani Roho mtakatifu hushiriki pamoja na roho yake kuombea hayo mambo ya siri, huku akili zikiwa hazina matunda. Lakini kwa kadiri anapoendelea kuomba, Roho mtakatifu anayafunua hayo mambo ya siri ili aweze kupata ufahamu juu ya mambo hayo. Ukisoma mithali 20:27 inasema “Pumzi (roho) ya mwanadamu ni taa ya Bwana; Hupeleleza yote yaliyomo ndani yake”. Utagundua kwamba Mungu huitumia roho ya mwanadamu kama taa kuyamulika yote yaliyofichika ndani yake. Roho itapeleleza yote ambayo hayajajulikana bado ili kuyafunua yaje nuruni yajulikane. Kwa njia hii inaweza kuyajua hata na mafumbo ya Mungu.

Kunena kwa Lugha kunaijenga nafsi na kuiimarisha

 

“Yeye anenaye kwa lugha hujijenga nafsi yake; bali ahutubuye hulijenga kanisa”. 1 Wakorintho 14:4

Biblia iko wazi kwamba yeye anenaye kwa lugha anafanya kazi ya kujijenga na kujiimarisha mwenyewe lakini yeye anayehutubu analijenga kanisa, kwa hiyo unapotaka kujijenga roho yako, jizoeshe kunena kwa lugha mara kwa mara, kwa sababu hii pia inasaidia kukupa uwezo na nguvu za kuomba kwa muda mrefu, na unapotaka kulijenga kanisa, ni muhimu ujizoeshe kuhubiri na kufundisha neno la Mungu mara kwa mara ili liweze kufaidi katika maneno utakayoyasema. Omba mara kwa mara kwa kunena kwa lugha, ili uweze kupata faida hizi na kuimarisha roho yako.

Kukua na kuimarika rohoni inauhusiana mkubwa na kumjua Mungu au kuwa na ufahamu na maarifa juu ya elimu ya utukufu wa Mungu. Hata hivyo kuwa na ufahamu na maarifa katika Mungu ni kigezo kimoja wapo kujua kwamba umekua na kuimarika. Biblia inasema “Lakini, kueni katika neema, na katika kumjua Bwana wetu na Mwokozi Yesu Kristo. Utukufu una yeye sasa na hata milele.” (2 Petro 3:18). Tunatakiwa kukua na katika kujua Bwana yaani kupata maarifa na ufahamu juu ya elimu ya Mungu ambavyo tunafahamu kama ufunuo (revelation) kutoka kwa Mungu. Hii hazina inajazwa ndani yetu kwa njia ya roho ya ufunuo. Kwa maombi ya mara kwa mara yanatuweka mahala pazuri kwa roho zetu kupata ufunuo.

Paulo alitamani watu wa Efeso waweze kukua na kuimarika katika kumjua Mungu, akawaombea roho ya ufunuo na roho ya hekima. Hekima ni muhimu ili waweze kutumia ipasavyo ufunuo wanaoupata. Hakuna namna utaweza kupata ufunuo wa kumjua Mungu katika neno lake bila maombi ya mara kwa mara. Unapoendelea kuomba mara kwa mara tena kwa bidii, ndipo utaanza kuona unaanza kulielewa neno la Mungu na kupata ufunuo ndani yake. Naamini siri hii ya maombi ndiyo iliyomsaidia Paulo kuelewa maandiko ya agano la kale kwa picha ya agano jipya. 

Jiombee na wewe mara kwa mara sara hii ambayo Paulo aliwaombea Waefeso baada ya muda utashangaa uelewa na ufahamu wako wa mambo ya rohoni unaongezeka na kuwa mkubwa. Maombi ya namna hii ndiyo yaliyomsaidia Daudi kupata ufahamu juu ya mambo yaliyokuwa yanamchanganya kwa sababu aliyokua hayajui na yaliyokuwa hayana majibu kwa jinsi ya kibinadamu. Mfano, juu ya ukame ulioikumba nchi yake (2 Samweli 21:1), pia kuhusu kufanikiwa kwa waovu (Zaburi 73:16-18). Mambo haya yalimsumbua sana Daudi, lakini ufumbuzi aliupatia kwenye maombi. Yafanye maombi kama sehemu yako, penda kuomba.

Endelea kufatilia mundelezo wa somo hili, Mungu akubariki